Piazzal Lorett

De Wikipedia
Jump to navigation Jump to search
Lumbard ucidental Quest articol chì l'è scrivuu in lombard, grafia milanesa.
Piazzal Lorett al dì d'incoeu.

Piazzal Lorett (Piazza Loreto, in talian) a l'è on pasquee de Milan ch'el se troeuva a la finn del Cors Buenos Aires, al principi del Vial Monscia e de Via Padova, in del Municipi 2, al confin cont el Municipi 3. A l'è on important gropp de la red di strad milanesa, degià che'l se troeva in longh de la circonvallazion esterna.

Storia

Agn'40: la foto la fa vedè 'l canton fra 'l piazzal e 'l cors Buenos Aires (indue 'l passava el tram); el se poeu vedè 'l distributor de benzina

Al temp del Ducaa de Milan, arent al piazzal gh'era la Gesa de Santa Maria de Lorett, dedicada a la Madonna de Lorett, putost frequentada di greches e di zonn visin. In seguit, anca se l'era staa sbatuu-giò el santuari, a l'è restaa el nomm del loeugh che l'era, intant, staa sistemaa comè on rondò e, donca, a l'è staa ciamaa Rondò de Lorett, in su la strada storega cha da Milan la rivava fina a la Villa Real de Monscia. El loeugh l'è staa, infin, ciamaa Piazzal Lorett.

Chì, indel 1857, a l'è staa mettuu in piè on padiglion provisori per ricev l'intrada in cità de l'imperador Francesch Giusepp d'Asburgh e la sò miee Elisabetta, duran el lor viagg diplomategh in del Regn Lombard-Venet.[1]

Duran la Segonda guera mondial, indela stragia de Piazzal Lorett, capitada el 10 agost del 1944, on quaj soldaa de la Legion Autonoma Mobile Ettore Muti a hann fusilaa quindes partigian antifassist insul marciapè ch'el se troeva intra el Vial Andrea Doria e el Cors Buenos Aires (el cipp comemorativ el se troeva spostaa de on tocch, in mezz al Vial Andrea Doria).

I cadaver del mussolini, cont la Petacci e on quaj gerarca fassista espost a Piazzal Lorett. Chell del mussolini a l'è el segond da sinistra

I corp de Benito Mussolini, ch'a l'era staa mazzaa a Giulin de Mezzegra el 28 april 1945, de la Claretta Petacci e de alter desdott coo de la Republega Social Taliana, rivaa a Milan la sira istessa, a hinn staa esponn in Piazzal Lorett vers a i trii or de la nocc,[2] proppi indue, el 10 agost de on ann prima, a eren staa fusilaa e lassaa esponn al pubblegh i quindes partisan.[3] I Sappisti de la 110ª Bregada Garibaldi a hann montaa la guardia fin a i sett or de la matinna.[2] Cont el passà di or, sempre pussee gent la se trouvava in Piazzal Lorett per assist al spettacquel corasc, tant ch'el servizzi d'orden, componnuu domà de on quaj omen e on quaj vigil del foeugh, ha deciduu de taccà-sù i corp a coo in giò a la tecc del distribudor de benzina al canton cont el Corso Buenos Aires, inscì che poeudeven vess veduu da tucc. I corp, ai quai a l'è staa giontaa chel de l'Achille Starace (che l'era el segretari del PNF ma crodaa in desgrazia e senza carigh indela RSI), fermaa per i strad de Milan menter el faseva ona corsetta e fusilaa a la s'cenna depos on process sommari,[4][5] a hinn restaa espost per ona quaj ora, in ona rassegna de insult, spuv e perarj, fin a inquand, perchè i autoridaa militar a eren preoccupaa. I corp a hinn staa, donca, portaa a l'obitori.[6]

Indel depos-guera, depos la liberazion de Milan, la piazza a l'è stada ciamada per on quaj temp Piazza di Quindes Martir, a ricord di partigian fusilaa, per poeu riciappà el sò nom de prima. Indel magg del 2005, el Steven Zecchi, l'assessor a la Coltura del Comun de Milan del temp, ha parponnuu de rebattezzà el piazzal comè Piazza de la Concordia.

Edifiz important

Straport

El piazzal a l'è servii da la stazion de la metropolitana milanes cont el nom istess, vona di pussee grand e affollaa de tota la red, si come a l'è pont d'inconter de la linia M1, la rossa, e M2, la verda.
El Piazzal l'è, olter, el capp-linia di lign de corier urban 39, 55, 56 e i lign di filobus circolar 90/91 ghe passen arent, insula Piazza Argentina.

Not e alter progett

Commons-logo.svg
  1. Mauro Colombo, La visita dell'imperatore Francesco Giuseppe nel 1857, milanoneisecoli.blogspot.it.
  2. 2,0 2,1 Fondazione ISEC - cronologia dell'insurrezione a Milano 24-30 aprile 1945
  3. Vincenzo Costa L'ultimo federale, il Mulino 1999, p. 107
  4. Giorgio Pisanò, Storia della guerra civile in Italia, cfr. fotografie alle pp. 1586 e 1587
  5. Ibidem, p. 1606
  6. Fra i molt testimon, a l'era present anca el giornalista Indro Montanelli.
  7. Mudel:Cita liber

Ligamm de foeura